DAVAO CITY- Gibalik na sa Davao City Library and Information Center ang ilang regular schedule alang sa City Book Mobile Library alang sa Elementary ug High School human nga gi-aprubahan sa Department of Education (DepEd) ang request niini nga Lunes hangtud Huwebes nga schedule alang sa mga tinun-an sa Elementary ug High School sa syudad.
Sumala ni Salome Enoc, hepe sa DCILC, nga sugod kagahapong adlawa, Oktobre 24, ma-access na sa mga elementary students ang book reading, storytelling, ug film viewing services samtang ang basic disaster orientation ang ihatag usab ngadto sa mga estudyante nga anaa sa sekondarya.
Nasayran nga niadtong adlaw nga lunes, ang tulonghaan sa Cabantian ang unang nakabenepisyo sa subling paglusad sa regular schedule sa maong mobile library.
Sa pikas bahin, isip tubag sa hangyo sa Daniel M. Perez Elementary School, nagpadala ang Davao City Book Mobile Library og mobile bus sa Bunawan, Davao City aron magpa-ambit og life-saving knowledge ug skills, ingon man moral values ngadto sa mga estudyante.
