DAVAO CITY – Gipahibalo sa ahensiya sa Department of Education pinaagi sa DepEd Memorandum No. 34, s-2020 nga i-suspende ang tanan nga mga aktibidad sa mga tulonghaan diin kalakip niini ang ipahigayon nga Regional Palaro (Regional Athletic Meets) kini tungod pa gihapon sa bahad sa Corona virus disease (Covid-19).
Kahinumduman nga gikatakda nga ipahigayon ang Davao Regional Athletic Association (DAVRAA) Meet sa April 1-7, 2020 sa Davao de Oro apan dili na kini mahinayon subay na sab na sa nahimong direktiba sa ahensiya kini aron nga makalikay ang mga estudyante sa posibleng pagkuyanap sa nahisgutan nga virus.
Gawas sa Davraa, kalakip sab nga gisuspende ang mga regional activities sa mga salmutan sa mga tinun-an, magtutudlo nga gi-require nga mobiyahe ug congregation sa nagkadaiyang tulonghaan ug division.
Kahinumduman nga mismong si Pangulong Rodrigo Duterte na ang nagpagula ug direktiba batok Covid-19 kini aron nga malikayan ang padayon nga pagsaka sa kaso niini dinhi sa nasod.
