DAVAO CITY- Gipakusgan pa sa Davao de Oro Police Provincial Office ubos sa pagdumala ni PCOL BENEDICTO F FACO, Officer-In-Charge, ang ilang kampanya batok sa Illegal Gambling.
Nagpahigayon og field inquiries ug monitoring ang unse ka mga Municipal Police Stations sa buhatan ngadto sa ilang tagsa-tagsa ka mga Area of Responsibility aron masiguro nga mahunong ug maminusan na ang illegal gambling activities sa maong dapit.
Sugod niadtong Enero 1, 2022 hangtud Setyembre 29, 2022, 204 ka mga indibidwal na ang nasikop human sa gipahigayon nga 88 ka mga operasyon batok Illegal Gambling sa Probinsya sa Davao De Oro.
Samtang ang buhatan nakakompiska og kinatibuk-ang kantidad nga P43,478 Bet Money atol sa maong mga operasyon. Gipanaad sa Davao de Oro Police Provincial Office sa publiko nga tumanon nila ang ilang mga katungdanan batok sa bisan unsa mang matang sa iligal nga kalihokan nga walay kahadlok o pabor.
Padayon matud pa nga magmonitor ug magpahigayon og mga tahas ug operasyon ang kapulisan aron hingpit mahunong ang mga kalihokan sa iligal nga sugal sulod sa probinsya.
Hugot nga gidili ni PCol. Faco sa publiko ang pagsuporta ug pag-apil sa bisan unsang matang sa ilegal nga sugal ug uban pang iligal nga kalihukan.
Busa, gi-awhag ang katawhan sa Davao De Oro nga i-report ang bisan unsang iligal nga binuhatan nga ilang masaksihan sa pinakaduol nga Municipal Police Stations. Bryan Chin Abe
