DAVAO CITY – Gibutyag sa Japan Chamber of Commerce and Industry (JCCI) nga ang kawad-on ug Davao-Tokyo direct flight sa dakbayan sa Davao ang nakababag sa pipila ka mga Japanese investors nga ikonsidera ang siyudad isip business location.
Sumala pa kang JCCI vice president Takeyoshi Sumikawa nga mahinungdanon ang direct flight alang sa mga negosyo aron nga masiguro nga ang mga produkto gikan sa Japan ang pabilin nga presko luyo sa pipila ka oras nga transport process.
Gitataw sab ni Sumikawa nga nakighinabi na sila karon kang DCCCII president Arturo Milan kalabot sa maong concern. Samtang daghanan sumala pa nga mga Japanese investors ang nagpakita karon ug interes dinhi sa siyudad, daghanan pa gihapon ang nagduha-duha gumikan sa air connectivity ingon man isyu sa kaluwasan ug seguridad.
Kalakip sab sa nahimong babag niini mao ang deklarasyon sa martial law dinhi sa Mindanao nga mihatud ug negatibong impact sa kaluwasan ug seguridad sa mga foreign investors.
Hinuon gitataw ni Sumikawa, nga pabilin ang ilang promosyon sa siyudad isip luwas nga lugar sa pagbubo ug negosyo ug giwagtang sab nila ang negatibong impormasyon sa Mindanao.
