DAVAO CITY – Nagpabilin pa gihapon karon nga positibo sa polio virus ang Davao river kini pinasikad sa subling gipahigayon nga eksaminasyon sa sapa sa milabay nga bulan sa Nobyembre.
Una na sab nga gibutyag ni Dr. Josephine Villafuerte, head sa City Health Office (CHO) nga sobra na ang nabakunahan nga mga bata dinhi sa dakbayan kalakip na kadtong mga midayo lamang sa siyudad apan aduna pa gihapoy pipila ka mga rehiyon sa Mindanao ang mihangyo nga lugwayan pa ang ikaduhang hugna sa Sabayang Patak kontra polio nga gisugdan kaniadtong Nobyembre 27 ug natapos kaniadtong Disyembre 7 sanglit wala naangkon sa pipila ka mga rehiyon ang ilang target nga mabakunahan.
Gipahimangnoan na lamang sa opisyal kadtong mga nanimuyo daplin sa Davao nga dili paliguon ang ilang anak sa sapa aron nga dili makaangkon sa nahisgutan nga virus.
