DAVAO CITY – Gisaka na sa PHIVOLCS ngadto sa Magnitude 7.4 ang linog nga miigo sa Hinatuan, Surigao del Sur gikan sa 6.9 pasado alas 10:00 sa gabii sa Disyembre 2, 2023.
Nakasinati og kusog nga pagtay-og ang ubang dapit sa Mindanao bandang alas-11:38, Sabado sa gabii.
Subay sa PHIVOLCS, duna kini gikusgon nga Magnitude 6.9, nga gipataas sa Magnitude 7.4 ug anaa sa episentro sa Hinatuan, Surigao Del Sur.
Tectonic ang tinubdan sa maong linog nga dunay gilay-on nga 30 kilometros east of Hinatuan ug gilawmon nga 25 kilometros.
Nasinatian ang Intensity V sa Bislig City, Surigao del Sur, ug Cabadbaran, Agusan del Norte.
Sigon sab sa mga nahagpat nga impormasyon, nasinatian sab sa ubang bahin gawas sa rehiyon ug sa Visayas ang maong gikusgon sa linog.
Ubay-ubay sab ang nasinatian nga aftershocks human sa linog.
Nasinatan dinhi sa Davao City ug Davao Region ang Magnitude 7.4 nga linog nga nitay-og sa Hinatuan, Surigao Del Sur.
Dinhi sa rehiyon, daghang katawhan ang nakurat ug dali-dali nga nigawas sa ilang gikahimutangan gumikan sa paglihok sa ilawom sa yuta kagabii.
Sa Davao City, dungan nga nanggawas ang mga tawo sa mga establisyemento human sa pagtay-og.
Hinuon,walay gikatalang major damages or casualties ang CDRRMO human sa linog apan nagpadayon gihapon ang monitoring sa istruktura nga nakitaan ug mga pagliki sama sa Bolton Bridge ug Matina Overpass nga dili una paagian sa mga katawhan.
Gipapahikling sab sa taas nga bahin ang mga residente nga nagpuyo sa mga kabaybayunan gumikan sa hulga sa tsunami.
Sa Cateel, Davao Oriental, nagdal-dali sa pagsaka ang gipahikling nga mga residente nunot sa gipasaka nga tsunami alert.
Na-activate na ang Emergency Operation Center ug Red Alert Status sa Provincial Disaster Risk Reduction and Management Council, diin naka alerto na ang tanang concerned agencies ug emergency personnel.
Bandang alas-3 sa kaadlawon, Disyembre 3 dihang gi-lift ang Tsunami Warning sa PHIVOLCS.
Namatikdan sab ang paghubas sa tubig sa Panabo City, apan gikumpirma sa Disaster Risk Reduction and Management Council sa probinsya nga walay tsunami threat sa probinsya ug nagpabiling kalmado ang dagat.
Nadanyos sab ang usa ka tulay ug usa ka dagkong simbahan sa New Corella, ug ubang bahin sa mall sa Tagum City.
Pipila ka mga kabalayan ug establisyemento ang nahugmak sa pipila ka bahin sa Davao de Oro nga unang gitay-og og pag-linog niadtong unang bahin ning tuiga.
Nasinatian sab sukad kagabii ang mga aftershocks sa pipila ka bahin sa rehiyon human sa nahitabong linog.
