DAVAO CITY – Nakatala sumala pa ug pagsaka ang Davao region ug gross regional domestic product (GRDP) ngadto sa 8.6 percent growth sa milabay nga 2018, o mas ubos sa 10.7 percent growth sa 2017.
Sa report nga gi-presenta sa Philippine Statistics Authority (PSA)-Davao, ang hinay nga pagsaka hinungdan sumala pa sa performance sa sub-sectors ilalom sa Industry Sector sama sa manufacturing nga nakatala ug 6.4 percent nga pagsaka sa 2018 gikan sa 11.4 percent sa 2017 ug construction nga miubos sa 18.1 percent gikan sa 37.9 percent.
Sumala pa kang National Economic and Development Authority (Neda)-Davao Director Maria Lourdes Lim nga kinahanglan pa nga palambuon ang maong sektor aron nga maangkon ang regional target sa 10.5 percent GRDP growth karong tuiga.
Gikanayong ang Mimaropa ug Davao Region ang ikaduha sa pinakapaspas nga nakatala ug growth rate sa mga rehiyon sa 2018. Ang Bicol Region nakatala ug pinakataas growth rate nga anaa sa 8.9 percent.
Kalakip sa lima ka mga pinakapaspas nga growing regions ang Central Visayas (7.6 percent), Calabarzon (7.3 percent), Cordillera Administrative Region (7.3 percent), ug Autonomous Region of Muslim Mindanao (7.2 percent).
Una ng gibutyag ni Mindanao Development Authority (MinDA) public relations head Adrian Tamayo nga dako ug natampo ang Build, Build, Build program ni Pangulong Rodrigo Duterte sa ekonomiya sa rehiyon.
Samtang gitataw sab ni Davao City Tourism Operations Office (CTOO) head Generose Tecson nga naka-posisyon ang dakbayan sa tourist and meetings, incentives, conferences and exhibitions (Mice) destination nga dakong tabang sab sa paglambo sa ekonomiya sa rehiyon.
