Gibutyag ni Chico Manginsay, Community Mobilizing Officer (CMO) sa Higala Community Center – LGBT Davao City Coalition, nga base sa datos sa HIV & AIDS Surveillance of the Philippines, ang National Capital Region (NCR) ang nanguna sa HIV cases, gisundan sa Region IV-A, Region III, ug ang Davao Region nga nahimutang sa ika-upat nga pwesto.
Matud ni Manginsay, sa Davao Region lang, gikan sa Enero hangtod Marso 2025, natala ang 306 ka kumpirmadong HIV cases o katumbas sa 6% sa tibuok nasud. Kadaghanan niini mga batan-on nga nag-edad 15 hangtod 35 anyos ang naapektuhan.
Gipatin-aw ni Manginsay nga duha ang mayor nga rason sa pagtaas sa HIV cases.
Una, ang pagdali og pag-access sa mga serbisyo sama sa libreng HIV testing sa mga sentro nga accessible sa publiko.
Ikaduha, ang stigma ug kahadlok sa pagpa-test tungod sa posible nga diskriminasyon nga gihimo sa komunidad, nga nagpugong sa uban nga moadto sa testing.
Ang Department of Health (DOH) nagpahimangno nga misaka og 500% ang kaso sa HIV, hinungdan nga kinahanglan pa nga mapalig-on ang awareness ug suporta aron mapugngan ang pagpadayon sa pagtaas sa mga kaso.
