DAVAO CITY- Pormal na nga gideklara ganihang buntag dungan sa gipahigayong Regional Peace and Order Council (RPOC) meeting nga insurgency free na ang tibuok Davao Region.
Nasayrang ang nahisgutang panghitabo gitambongan sa mga opisyal sa militar, kapulisan, stakeholders, mga opisyal sa Local Government Unit (LGUs) sa Davao region, diin gi-presenta sa Assistant Chief of Staff for Operation sa 10th ID Philippine Army nga si Lt. Col. Victorino Ensenio ang mga lakang nga gimugna sa kagamhanan hangtud nga makab-ot nila ang ilang mga tumong nga mamahimong insurgency free ang rehiyon batok sa mga rebelde nga grupo.
Gani, sa nagkalain-laing dapit sa Davao region, pipila ka dekada sab nga naglihok ang mga rebelde nga grupo.
Samtang, usa sa ilang gipasalamatan mao si kanhi Pangulong Rodrigo Duterte nga maoy nangusog ug nagmugna og mga lakang arun nga motahan sa gobyerno ang mga rebelde ug mahatagan og kahigayunan nga bag-uhon ilahang kinabuhi.
Kahinumduman nga daghanang mga rebelde ug mga nagasuporta niini ang mitahan sa kagamhanan ilalom sa administrasyon sa kanhi pangulo.
VIA|| KAYE MARIE GULLE
