DAVAO CITY – Anaa na karon ang Davao region sa ika-pito nga adunay mga bag-ong indibidwal nga na-diagnose og Human Immunodeficiency Virus/Acquired Immunodeficiency syndrome (HIV/Aids) sa nasud sulod sa Agosto 2019.
Subay sa record gikan sa HIV/Aids and ART Registry of the Philippines (HARP) nga gipangunahan sa Department of Health-Epidemiology Bureau (DOH-EB), nga sa bulan sa Agosto 2019 lamang, adunay kinatibuk-ang 1,228 ka mga bag-ong kaso sa HIV-positive nga mga indibidwal sa nasud.
Mas taas sumala pa kini og 17 percent kung itandi sa susama nga panahon sa milabay nga tuig nga anaa sa 1,047.
Nag-una ang National Capital Region (NCR) sa mga adunay pinakataas nga kaso nga anaa sa 34 %, Calabarzon nga adunay 18 %, Central Luzon nga adunay 9 %; Central Visayas nga adunay 8 %; Western Visayas nga adunay 7 %; Soccsksargen nga adunay 6 %, ug Davao Region nga adunay 4 %.
Gikanayon sa DOH-EB nga ang average sa mga indibidwal nga bag-ong diagnosed og HIV/Aids matag adlaw ang padayon nga nagkataas diin sa milabay nga 2019, anaa kini sa 36 kung itandi sa 32 sa 2018.
Sa 2008, usa ka tawo lamang ang makaangkon ug HIV/Aids matag adlaw; samtang sa 2011 anaa sa pito samtang 16 matag adlaw sa tuig 2014.
