DAVAO CITY – Gitay-og ug magnitude 5.5 nga linog ang Davao Region kagahapon sa alas-4:05 sa hapon.
Anaa sa Matanao, Davao Del Sur ang episentro sa maong linog nga nabati sab sa Davao City diin natala ang Intensity IV.
Nasinati sab ang kakusog sa linog sa mga kasikbit nga mga probinsya.
Temporaryong nahunong ang mga klase sa tulunghaan ug transaksyon sa mga opisina samtang nagpahigayon ug evacuation sa mga apektadong lugar.
Wala man hinuon natalang mga nakabsan sa kinabuhi o nasamdan sa maong linog.
Subay sa pagpanubay sa PHILVOLCS, nakasinati ug Intensity V ang Kidapawan City; Koronadal City, ug Norala, South Cotabato.
Samtang Intensity IV sa Jose Abad Santos, Davao Occidental; Alabel, Sarangani; Tampakan, Tantangan, Tupi, General Santos City, South Cotabato; ug Columbio, Sultan Kudarat.
Intensity III ang nasinati sa Libona, Bukidnon; Obando, Bulacan; Don Marcelino, Davao Occidental; Maasim, Kiamba, Malapatan, Sarangani; Santo Nino, Polomolok, Suralla, ug T’Boli, South Cotabato.
Intensity II sa Alamada, Cotabato; Nabunturan, Davao de Oro; Maitum, Sarangani; ug Lake Sebu, South Cotabato.
Samtang Intensity I ang nasinatian sa Malaybalay, Cagayan de Oro, ug Misamis Oriental.
via || Bombo LJ Florendo
