DAVAO CITY – Gawasnon na sab karun ang lalawigan sa Davao Oriental sa kaso sa Covid-19 human nga hingpit na nga nakarekober kagahapong adlawa ang aktibong kaso sa lugar.
Sumala sa Provincial Epidemiological Surveillance Unit kon PESU, nakagawas na karon sa Southern Philippines Medical Center (SPMC) ang pasyente nga residente sa Lupon human nga hingpit na kini nga nagmaayo.
Nasayran nga nakatala ang lalawigan ug mukabat sa 349 ka mga kaso sa mga namatay diin dakung porsyento o 303 niini ang dili bakunado, 20 ang nabakunahan sa first dose ug 26 ang fully-vaccinated.
Apan bisan nga wala nay natala nga mga kaso sa Davao Oriental, nanawagan pa gihapon ang Provincial Health Office ngadto sa tanan nga dili pa gihapon mokumpiyansa kay nagpabilin pa gihapon ang pandemiya ug gani adunay migula na sab nga mga bag-ong variant niini.
Gina-awhag sab niini ang mga residente sa lugar nga mo-obserba sa BIDA solusyon PLUS sa COVID-19 o B-Bawal ang walay mask; I-Isanitize ang kamot; D-Distansya ug usa ka metro sa ubang tao; A-Aksyon base sa tinuod nga impormasyon; PLUS-Suportahan ang bakuna kontra COVID-19.
Una ng nasayran nga ang ulahi nga nagmaayo sa sakit mao ang ika-9,294 nga kaso sa tibuok probinsiya ug ang ika-8,945 nga naka-recover.
