DAVAO CITY – Mipanaw na ang gobernador sa probinsya sa Davao Oriental nga si Corazon Malanayaon kagahapon sa hapon.
Masulub-on kining gikumpirma ni Vice Governor Niño Sotero Uy atol sa nahitabong anunsyo kagabii.
Mipanaw ang gobernadora bandang alas-3:50 sa hapon adlawng Miyerkules, Hunyo 28.
Una kining gikumpirma sa iyang anak nga si Michelle Malanyaon – Centeno sa alas-6:59 sa gabii.
Gikasubo sa tibuok lokal nga panggamhanan sa Davao Oriental ang wala sa panahon nga pagpanaw sa gobernadora.
Gihulagway ni Vice Governor Uy ang nahisgutan nga dunay espesyal nga lugar sa kasingkasing sa mga katawhan sa probinsya gumikan sa iyang walay puas ug kinasing-kasing nga pagpangalagad.
Naghangyo ang lokal nga panggamhanan sa tanan nga ipahilungod ang ilang mga pag-ampo ngadto sa pamilya ni Governor Cora nga nag-atubang sa pinakamasulub-on niining panahon.
Wala pa matino ang rason sa kamatayon sa gobernadora apan nasayran nga duna siya’y gihambing nga balatian.
Gikuptan sa maong opisyal ang pagka-gobernador sa Davao Oriental sulod sa tulo ka termino sukad pa niadtong 2007 hangtod 2016.
Nitaliwan si Governor Cora sa edad nga 73 ug gikatakdang magsaulog sa iyang adlawng natawhan karong Agosto.
via || Bombo LJF
