DAVAO CITY – Nagpahayag sa iyang kadismaya si Davao Occidental Gov. Claude Bautista human nga gibutyag ni Davao del Sur Governor Dodo Cagas nga pasirad-an niini ang utlanan sa ilang lalawigan human nga nakatala ug unang kaso sa Covid-19 ang Davao Occidental.
Sumala kang Gov. Bautista angayan sumala pa nga magtinabangay ang tanan ug ipadaplin ang politika ilabi na nga mismong si Mayor Sara Duterte-Carpio ang naghimo ug mga pamaagi aron nga magkahiusa ang tibuok lalawigan sa Davao region sa pagbatok sa Covid-19.
Kahinumduman nga usa ka 65-anyos nga taga-Malita nga dunay hypertension ug sakit sa kasing-kasing ang namatay kagahapon sa Southern Philippines Medical Center ug nakumpirma nga positibo kini sa covid-19.
Gisubay na sab sumala pa nila karon kung asa posibleng nakuha sa nahisgutan ang maong virus.
Gipatuman na sab karon sa lockdown ang lugar diin nanimuyo ang pasyente ingon man ipailalom sab sa rapid mass testing ang mga residente ug pamilya niini ingon man ang mga ulahing nakahimamat sa pasyente.
