DAVAO CITY – Hugtanon ang gihimong pagbantay sa Bureau of Quarantine dungan sa pag-abot sa dakbayan sa Davao kagahapong adlawa sa mga pasahero nga gikan mismo sa Jinjiang, China sakay sa Xiamen Air.
Dungan sa pagtugpa sa nahisgutan nga eroplano, hugtanon sab ang gipatuman nga monitoring sa Bureau of Quarantine diin gigamit niini ang thermal scanner aron nga ma-detect kung aduna bay bag-ong mga pasahero nga nagdala og sintomas sa novel coronavirus o 2019-nCoV.
Sumala pa sa Bureau of Quarantine, sa higayon nga mopula ang ulo sa mga pasahero gamit ang thermal scanner, gilayon nila kini nga i-hold ug i-double check aron nga masiguro nga dili makalusot ang nahisgutan nga virus sa syudad.
Namatikdan nga tanan nga mga pasahero sa nahisgutan nga flight ang nakasul-ob og face masks gumikan na sab sa mga pahimangno.
Hinuon, base sa monitoring sa Bureau of Quarantine sa mga miabot nga mga pasahero ilabi na ang mga Chinese Nationals, nag-negatibo kini sa sintomas sa 2019-nCoV.
