Gitapos sa Davao Eagles nga puno sa kalipay ug pasidungog ang Palarong Pambansa 2024 human nakab-ot ang laraw nga ika-upat nga pwesto.
Sa final and official Palarong Pambansa 2024 Medal Tally Reporting System, nakasecure ang Davao Region og 32 ka mga bulawang medalya, 25 ka silver ug 35 ka mga bronze.
Gawas pa sa maong mga medalya, giila usab ang rehiyon isip First Placer sa Most Organized Delegation, Second Placer sa Best Billeting School, Second Placer sa Digital Engagement Award, ug Third Placer sa Most Disciplined Delegation.
Gumikan niini, nipadayag og dakong pasalamat si DepEd XI Regional Director Allan G. Farnazo sa tanang magtutudlo ug principal nga way puas nihatag og suporta sa mga batang atleta. Kalakip sa gipasalamatan sa opisyal mao ang mga opisyal sa Brgy.,Fire Volunteer Brigade, mga kaabag gikan sa pribadong sektor, opisyal sa PNP, ug tanang mga Dabawenyo alang sa pagsporta ug pag-atiman sa delegates.
Gitambungan sab ni Vice President Sara Duterte ang closing ceremony sa Palaro isip outgoing DepEd Secretary Sara Duterte.
Ning kasamtangan, excited na ang Davao Region sa pagwelcome sa mga atleta nga makauli dinhi sa rehiyon ingon man ang mga pamilya usab niini human nga nihatag og dakong pasidungog ug kadaogan sa Davao Region.
Ginalauman karon sa DepEd XI ang pagpadayon sa maayong performances sa mga bata alang sa 2025 palarong pambansa sa Ilocos Norte ug 2026 palarong pambansa sa Agusan del Sur.
