DAVAO CITY – Mapabilin ang kahusay ug kalinaw ug mapakusgan ang anti-terrorism ug anti-criminality surveillance ang pipila sa mga nag-una nga rason nganong ipatuman karun sa probinsiya sa Davao del Sur ang curfew.
Laraw sab sa lugar nga mapalig-on pa nila ang ilang seguridad ilabi na karun nga 10 ka adlaw na lamang ayha ipahigayon ang eleksiyon.
Kahinumduman nga sa gipagula nga Executive Order No. 24 sa probinsiya, alas nuebe sa gabie magsugod ang curfew ug matapos kini sa alas 4:00 sa kaadlawon.
Hinuon nadunay pipila ka mga indibidwal nga exempted sa kamandoan sama na lamang kadtong mga empleyado nga mag-out sa nahisgutan nga oras sama na lamang sa mga frontliners sama sa mga doktor, nurse, ug daghanan pa ingon man mga empleyado sa public utility companies, agricultural ug non-agricultural cargo, mga biyahero nga mulatas lamang sa Davao del Sur ug kung adunay emerhensiya ilabi na kadtong dad-on gilayon sa balay tambalanan.
Gumikan kay alas nuebe sa gabie magsugod ang curfew, kinahanglan nga manirado na sab ang mga establisyemento gawas lamang sa balay tambalan ug mga mga botika.
Sa mga mugawas o anaa sa gawas sa nahisgutan nga oras, kinahanglan nga mu-presenta kini ug ID ug tanggalon ang helmet sa mga motorista samtang kinahanglan nga ablihan ang bintana sa mga sakyanan sa higayon nga mulatas sa checkpoints.
Kahinumduman nga init ang sitwasyon sa lugar dungan sa nagsingabot nga eleksiyon ug nagpabilin pa sab ang bahad sa covid-19 hinungdan nga kinahanglan pahugtan pa ang pagpatuman sa seguridad.
Kahinumduman nga adunay mga lugar sa Davao del Sur ang kalakip sa mga gitutukan sa otoridad gumikan kay gawas nga init ang panag-atbang sa mga politiko, adunay mga presensiya sab sa mga armadong grupo.
