Mitahan ang laing lima ka kanhing miyembro sa New Peoples Army (NPA) kansang opisyal nga misurender sa kagamhanan sa Davao del Norte. Ang mga rebelde, nga kauban sa Guerilla Front 88 nga naglihok sa Agusan del Norte ug Agusan del Sur, mipili nga biyaan ang armadong pakigbisog ug mosugod og bag-ong kinabuhi ubos sa suporta sa probinsya. Apil sa ilang gisurender mao ang upat ka high-powered firearms ug usa ka pistola.
Personal nga gidawat sa gobernador, nailhan nga si “Kuya Gob,” ang mga misurender, uban sa mga opisyal sa kasundalohan ug kapulisan sama nila BGen. Felix Ronnie Babac sa 1001st Brigade, Col. Harold Argamosa, PCol. Alexander Serrano, Jr., ug DILG Provincial Director Jonathan Leybag. Gibutyag sa gobernador nga padayon ang probinsya sa paghatag og konkretong tabang alang sa reintegrasyon sa mga kanhing rebelde ilawom sa programang naglangkob sa edukasyon, panginabuhian, ug psychosocial interventions.
Dugang pa, ang kalinaw ug kalamboan sa Davao del Norte gilangtaw nga mas lig-on pinaagi sa paghatag og oportunidad sa mga kanhing rebelde nga gustong mobalik sa sabakan sa katilingban. Ang maong programa usa ka epektibong paagi aron malikayan ang pagbalik nila sa armadong grupo ug sa baylo, mahimong aktibong kabahin sa pagtukod sa usa ka malinawon ug mauswagong komunidad.
