DAVAO CITY – Gikondena sa lokal nga panggamhanan sa lungsod sa Maco sa Davao de Oro ang nahitabong pagpamusil-patay sa SK Federation President nga si Jorlan “Bon” Sacay, niadtong Martes sa gabii.
Sumala ni Maco Mayor Arthur Carlos Voltaire Rimando, desidido ang LGU nga papanubagon ang mga responsable sa pagpamatay sa maong public servant.
Gibutyag ni Davao de Oro Governor Dorothy “Dotdot” Gonzaga nga kaniadto pang tuig 2016 dihang namatikdan ang init nga politikanhong gubat sa lungsod sa Maco, apan daghanang kaso niini ang hingpit nang nasulbad.
Ginapalihok sab sa gobernadora ang mga otoridad sa probinsya nga segurohon ang kaluwasan sa mga public servants ilabi nang naghinapit na ang piliay sa barangay karong tuiga.
Sumala sa insiyal nga imbestigasyon, away politika ang nakitang motibo rason nga gipusil-patay si Sacay niadtong Hulyo 18 sa gabii.
Sumala pa, gikan mitambong og meeting ang biktima ug human sa maong aktibidad, misakay kini gamit sa iyang sakyanan papauli sa iyang panimalay.
Apan sa higayon nga miabot na kini, kalit na lamang nga gipusil ang biktima sa wala pa mailhing suspetsado sakay ang motorsiklo ug gilayong misibat sa wala matinong direksyon.
Gidala pa sa balay tambalanan ang SK Chairman apan gideklara kining dead on arrival.
Narekober sa crime scene ang 6 ka basiyo sa bala sa punto 45 nga pistola.
Anaa karon gihaya sa Rubio Funeral Homes sa Tagum City ang patayng lawas sa biktima ug ginapalawman na usab kapulisan ang ilang imbestigasyon aron nga mailhan ang nagpaluyo sa krimen.
Hugot sab nga gikondena sa pipila ka mga law school organizations ang nahitabong kamatayon ni Sacay samtang nagpaabot sab og pahasubo ang LGU sa probinsya ngadto sa nabiyaan nga pamilya sa biktima.
Gi-anunsyo sab sa Maco LGU ug Provincial Government nga magtanyag sila og P2.5 million pesos alang sa makatudlo sa responsable sa kamatayon ni Sacay.
via || Bombo LJF
