DAVAO CITY – Gideklara ang suspension sa mga klase sa pampubliko og pribadong tulunghaan lakip na opisina sa gobyerno karong adlawa human sa nahitabong pagtay-og sa duha ka linog sa probinsya sa Davao de Oro kagahapon.
Unang gitay-og ang New Bataan bandang alas-2:02 sa hapon, ug pagkahuman sa lapas napulo ka aftershocks, gitay-og pag-usab og laing magnitude 5.9 ang New Bataan bandang alas-4:29 sa hapon.
Sumala sa datos nga nahipos sa Provincial Disaster Risk Reduction and Management Office sa Davao de Oro, 5 ka mga dalan ang dili na maagian, samtang 2 ka pagdahili sa yuta ang nahitabo sa Brgy. Luzvimin – Katipunan National Highway.
Nakigkoordinar na ang Office of the Civil Defense 11 sa mga PDRRMOs, DSWD ug PHIVOLCS alang sa pagpaniid sa mga katikaran atol sa linog.
Nakadeploy sab ang PDRRMO Davao de Oro’s Response Cluster ug uban pang rescue teams sa mga ospital og tulunghaan.
Giadtuan dayon nila Governor Dorothy Montejo-Gonzaga ug Congressman Ruwel Peter Gonzaga ang Davao de Oro Provincial Hospital sa Maragusan arun sutaon ang sitwasyon sa mga pasyente ug pag-asikaso usab sa ilang mga panginahanglan human sa sunod-sunod nga pagtay-og sa linog nga nasinati sa probinsya.
Kahinumduman nga aduna sab damage sa struktura nga nakita sa maong hospital sa nahitabong Pebrero 1 nga linog.
Gilayong nagdeklara og suspension si Maragusan Mayor Angelito Cabalquinto sa mga opisina sa gobyerno. Gisususpinde sab sa Provincial Government ang tanang kalihukan sa ika-25 nga Bulawan Festival sugod kagahapong adlawa hangtud karong adlawa, Marso 8, gawas sa Foundation Day Program ug Santos nga Misa.
via || Bombo LJF
