DAVAO CITY – Mihatag ug katin-awan ang ahensiya sa City Social Welfare and Development Office (CSWDO) nga dili tanan ang makadawat og relief assistance ang dabawenyo dungan sa gipatuman nga enhanced community quarantine kini dungan sa padayong hulga sa Corona virus disease (Covid-19) sa syudad.
Sumala pa kang CSWDO head Malou Bermudo, nga target sumala pa karon sa syudad ang 350,000 ka mga pamilya gikan sa 182 ka mga barangay sa syudad ang mahatagan og relief goods.
Sumala pa sa opisyal nga mihangyo sila og pagsabot gumikan kay kinahanglan nila nga unahon kadtong pamilya lamang nga mas nanginahanglan partikular na kadtong makonsiderang mga indigent, nawad-an ug trabaho ingon man panginabuhian gumikan sa gipatuman nga community quarantine, naapektuhan, sa “no work, no pay” workers, ingon man ang mga self-employed, ug kadtong nahunong ang trabaho sa temporaryo nga pagsirado sa mga negosyo ning siyudad.
Gitino usab ni Bermudo nga dili pasabot nga kung dili registered voter ang usa ka pamilya o indibidwal sa syudad, dili na kini mahatagan og hinabang sa gobyerno.
Padayon sumala pa ang validation sa matag barangay aron sutaon ang kahimtang sa mga pamilya o mga indibiwal aron malakip sa listahan sa mahatagan og hinabang sa kagamhanan.
Gipasabot usab ni Bermudo nga unang hugna pa lamang sila nakahatag og relief assistance sa mga barangay, kini human nga dunay migawas nga mga balita nga makadaghanng higayon na ang ubang barangay nga nagapanghatag og mga rasyon sa ilang mga ginsakpan.
