DAVAO CITY – Opisyal nang sugdan ang pagtukod sa bag-ong Davao City Public Hospital nga nagtumong sa paghatag ug dekalidad nga serbisyong medikal sa mga lagyong bahin sa dakbayan.
Ang maong P1.75 billion nga proyekto, gikatakdang itukod sa 3.2 ektaryas nga luna sa may University of the Philippines – Mindanao Campus sa Mintal, ning dakbayan.
Anaa sa gipahigayong groundbreaking ceremony kagahapon sila Vice Mayor J. Melchor Quitain sa ngalan ni Mayor Sebastian Duterte, UP President Danilo Concepcion, UP Mindanao Chancellor Lyre Anni Murao, ug pipila ka mga konsehal.
Sumala pa sa Davao City Information Office, gigahinan kini sa Philippine Amusement and Gaming Corporation kon PAGCOR ug P1.5 billion, samtang P250 million niini gikan sa pondo sa panggamhanan.
Imuntar sa maong Level III nga ospital ang mga serbisyo sama sa emergency, outpatient ug laboratory services; lakip sab ang Respiratory, Intensive Care, Neonatal Intensive Care, Physical Medicine and Rehabilitation, ug Isolation units.
Gikanayon ni Vice Mayor Quitain nga importante karon ang pagmugna ug ospital aron pakusgan ang sektor sa kahimsog sa dakbayan ug ingon man sa tibuok rehiyon.
Kahinumdumang gipirmahan sa ika-19 nga konseho sa Davao City niadtong Mayo 2021 ang ordinansa ni Councilor Mary Joselle Villafuerte nga naglaraw sa pagtukod sa maong health facility.
Opisyal kining gilagdaan ni kanhi mayor ug kasamtangang Bise-Presidente Sara Duterte niadtong Hunyo 7, sa susamang tuig.
via || Bombo LJF
