DAVAO CITY – Gikatakdang matukod ang Davao City Public Hospital diha mismo sa tugkaran sa Unversity of the Philippines Mindanao nga nahimutang sa Bago Oshiro, Davao City.
Tumong sa bag-ong ospital nga maabot sa mga residente sa ikadulong distrito ning dakbayan ang pinakaduol ug dekalidad nga serbisyong medikal imbes na mulahos pa sa Southern Philippines Medical Center nga kasamtangang nag-inusarang pampublikong ospital sa dakbayan.
Gahinan sa lokal nga panggamhanan sa Davao ang pagpatukod ug operasyon sa maong ospital, samtang libre nga ipagamit sa UP Mindanao ang ilang luna diin tukuron ang ospital.
Nagkigpulong na sab ang tulunghaan ngadto sa mga informal settlers nga nahimuyo sa maong luna una pa man sugdan ang pagtukod niini.
Kahinumdumang giaprubahan sa konseho sa Davao City niadtong May 4, 2021 ang “Davao City Hospital Ordinance” ug opisyal sab kining gilagdaan ni kanhi mayor ug kasamtangang Bise-Presidente Sara Duterte niadtong Hunyo 7, sa susamang tuig.
Ang DCPH, usa ka Level III 100-bed capacitated hospital nga magsilbi sab nga training hospital sa ipatuman sab nga UP Mindanao medical education program.
via || Bombo LJF
