DAVAO CITY – Sangkap na ug andam ang Davao City Police Office (DCPO) alang sa State of the Nation Address (SONA) ni Pangulong Rodrigo Duterte nga ipahigayon karong Hulyo 24, tuig kasamtangan.
Maximum tolerance ang ilang ipatuman sa matigayon nga mga rally sa mga membro sa militanteng pundok nga wala maka-uyon sa pagpadagan sa kagamhanan ni Pangulong Duterte.
Sumala pa kang DCPO Spokesman Police Senior Inspector Maria Teresita Plaza Gaspan nga gawas sa Public Safety Company, mopadala sab ang Police Regional Office (PRO) – 11 ug pwersa aron nga dili magkulang ang kapolisan sa DCPO.
Niining adlawa nagpahigayon ug drill ang kapolisan sa ilang himoon atol sa pag-atubang sa mga protesters aron nga wala’y masakitan sa bahin sa mga police o kaha sa mga protesters.
Gipasabot sa kapolisan nga nasabtan nila ang yangongo sa mga militanteng pundok, apan kinahanglan sab nga kapanalipdan ang katungod sa kinabag-an nga pundok sa maapektohan nga mga katawhan.
