DAVAO CITY – Nagpaklaro atubangan sa daghanang Dabawenyo si Mayor Sebastian Duterte atol sa gipahigayong opening sa Pasko Fiesta 2023 ning nilabayng gabii.
Sa pag-atubang niini sa katawhan, gi-isa isa niyang gipaklaro ang mga nanggawas nga kritisismo sa iyang pagpangatundanan isip kasamtangang mayor sa Davao City.
Sumala pa kang Mayor Baste ngadto sa katawhan, nasayud kini nga dunay kalainan ang iyang istilo sa pagdumala kon itandi sa iyang amahan nga si kanhi Pangulong Rodrigo Duterte nga nahimo sab nga mayor sa dakbayan sa halos duha ka dekada.
Gipahimumduman niya kadtong mga wala nahiuyon sa iyang istilo sa pagdumala nga dili siya botaran sa musunod nga eleksyon.
Apan pasalig niini nga padayon niyang panalipdan ang mga kabus, ug mga gipanamas-tamas nga katawhan.
Dugang pa sa mayor nga kon dili mapanalipdan ang dakbayan, lauman ang pag-antus sa tanang katawhan.
Nagpasabot sab ang mayor nga dili kini kasagarang magpakita sa midya tungod dili sab kini gusto mahimong trapo kon traditional politician.
Apan, gipaningkamutan sa mayor nga magtrabaho aron matubag ang mga panginahanglanon sa katawhan isip iyang obligasyon.
Gipasalamatan sa mayor ang mga nagtabang nga mga buhatan sa Davao City LGU sa pagpabilin sa kahapsay ug kalinaw sa dakbayan.
Nanghinaot ang mayor nga mipatigbabaw ang pagkasinabtanay sa matag Dabawenyo panahon sa kapaskuhan.
Kahinumduman nga nahimong bise mayor sa syudad ang kinamanghurang anak ni FPRRD niadtong 2019 hangtud 2022, ug nidaog kini nga walay kalaban isip pagka-mayor atol sa 2022 National Elections.
