DAVAO CITY – Subling ipadayon ni Davao City Mayor Sebastian Duterte ang war on drugs sa lokal nga kagamhanan, taliwala pa sa administrative relief sa 35 ka mga pulis ug personnel, lakip na ang hepe sa Davao City Police Office.
Sa maong pamahayag, giklaro sa mayor nga iyang kaugalingong desisyon ang war on drugs sa Davao City ug dili sa PNP kon national government.
Gipahayag niya nga ang iyang prayoridad mao ang pagpanalipod sa mga inosente ug ang pagpukan sa mga nagapayuhot og ilegal nga droga.
Kahinumduman nga nangayo og katin-awan si Duterte gikan sa Department of Interior and Local Government (DILG) ug Pangulong Ferdinand Marcos Jr. bahin sa pag-relieve sa 35 ka mga pulis sa Davao City. Matod niya nga adunay maayong track record ang hepe ug personnel sa DCPO sa pagserbisyo sa mga Davaoeño ug wala malambigit sa korapsyon o pag-abuso sa gahom.
Gisaway ni Duterte ang bag-o nga kamandoan nga tangtangon ang mga opisyal sa pulisya tungod sa double standard, gumikan sa pagsusi sa mga commanding officer o kadtong nalambigit dayon sa mga insidente, nga gitugotan ang nahabilin nga mga kawani sa pagpadayon sa ilang wala’y hunong nga mga katungdanan.
Nanawagan siya alang sa patas ug balanse nga imbestigasyon nga nagmintinar sa kaepektibo ug moral sa mga law enforcement agencies aron masiguro ang kaluwasan ug seguridad sa Davao City nga dili ikompromiso ang mga prinsipyo sa hustisya ug due process sa balaod.
