DAVAO CITY – Ipatuman sumala pa sa lokal nga panggamhanan ang lu-ag nga lockdown restrictions sugod sa Mayo 8 aron nga tugtan kadtong mga pribadong sakyanan nga makasulod sulod sa 12 hours aron nga kuhaon ang ilang mga paryente nga na-stranded sukad nga gipatuman ang lockdown kaniadtong Marso 19.
Sumala pa kang City Tourism Office head Generose Tecson, nga maoy gitahasan nga manguna sa Davao City Stranded Persons Database Center, wala pa napagula sa lokal nga panggamhanan ug guidelines kalabot sa pagtugot sa 12-hour passage sa mga nanag-iya ug pribadong sakyanan.
Ang paglu-ag sa lockdown restrictions tipik lamang sa panawagan sa mga non-Davao residents nga tugtan sila nga makasulod aron nga kuhaon ang ilang mga paryente.
Dili pa sab mabutyag ni Tecson kung hangtud kanus-a kini ipatuman apan sugdan kini karong Mayo 8.
Abli ang checkpoints sa siyudad alang sa mga pribadong sakyanan sugod sa alas 8:00 sa buntag hangtud na sa alas 4:00 pm apan kinahanglan nga mobiya na kini sa siyudad paghuman sa 12 ka oras human ang pagsulod.
Adunay ipahimutang usab nga mga doktor sa processing areas sa Lanang alang sa mga molatas nga sakyanan subay sa Bunawan, Lumondao checkpoint sa Marilog ingon man kadtong mga mosubay sa Bukidnon, ug Toril checkpoint ingon man kadtong gikan sa Davao del Sur.
Mamahimo sumala pa nga mosulod ang sakyanan sa mga gimuntar nga “entry ug exit points.”
