DAVAO CITY- Motunol og tabang pinansyal ang Davao City LGU ngadto sa mga apektadong pamilya human sa natigayong grabeng pagbaha nga epekto sa Bagyong Carina sa Luzon Area kaniadtong nakalabayng adlaw.
Kahinumduman nga daghanang mga lugar ang nagdeklara na og state of calamity tungod sa epekto sa Bagyong Carina partikular na sa NCR, Calabarzon, Mimaropa, ug Central Luzon.
Gumikan niini, ubay-ubay ka mga pamilya ang nanginahanglan og tabang hilabi na sa mga nag-unang panginahanglan.
Sumala pa ni Harvey Lanticse, hepe sa City Information Office Head nga dili na bag-o sa dakbayan ang pagtunol og tabang ngadto sa mga nanginahanglang indibidwal ug lugar.
Pangunahan sa Davao City Disaster Council ang maong plano samtang gina-andam pa sa buhatan ang mga kinahanglang butang kon rekisitos sa maong pagtabang.
