DAVAO CITY – Adunay dagkung ganti nga nagpaabot sa mga Dabawenyong atleta nga maghatag ug kadaugan alang sa dakbayan.
Giaprubahan sa lokal nga panggamhanan sa Davao City ang usa ka ordinansa nga maghatag ug cash incentives alang sa mga Dabawenyong palarang nakadaog sa mga kumpetisyon sa paugnat sa kusog.
Malipayong gipaambit ni Councilor Jaffar Marohomsalic ngadto sa mga Davao athletes ug coaches ang pag-apruba sa maong ordinansa sa ikatulo ug ulahing pagbasa sa Davao City Council.
Gikanayon ni Marohomsalic nga alang sa Davao City sole representative o ubos sa lima ka myembro nga nisalmot sa regular international competition inubanan sa pagpanubay sa Philippine Olympic Committee, makadawat ug P30,000 alang sa gold medalist, P20,000 alang sa silver, ug P10,000 alang sa bronze medalist.
Samtang sa team category, makadawat ug insentibo nga P25,000 alang sa gold medalist, P20,000 alang sa silver, ug P10,000 alang sa bronze medalist.
Duna sab ihatag nga insentibo alang sa mga atleta nga nagsalmot sa mga national competitions nga dili mulampas sa lima ka mga representante o sa individual category, diin P15,000 alang sa gold, P12,000 alang sa silver, ug P10,000 alang sa bronze medalist.
Samtang, P25,000, P20,000, ug P10,000 sab ang madawat alang sa team nga dili muubos sa lima ka myembro. Makadawat sab ug mga cash reward ang mga representante sa regional competitions.
Kini ang pamaagi sa Davao aron mapasiduggan ang ilang kadaugan isip repreentante alang sa nasud gikan sa Davao City.
via || Bombo LJ Florendo
