DAVAO CITY – Giangkon karon sa Davao City Cooperative Development Office (CDDO) nga nalisdasn sila sa paggukod sa mga indibidwal o kooperatiba nga wala pa nakabayad sa ilang loan o utang sa dakbayan sa Dabaw kung diin moabot na kini sa kapin P37 Milyon subay sa audit nga gihimo sa Commission on Audit (COA) XI.
Sumala ni Senior Cooperative Development Specialist Ubaldo Nuez nga gipangitaan na sila karon og mga dokumento sa COA kung giunsa nila pagkolekta ang mga utang apan ang problema niini ang ubang utang nagsugod pa niadtong dekada 90 kung diin ang buhatan sa City Cooperative Development wala pa namugna niadtong panahona gumikan namugna lamang kini niadtong tuig 1999.
Gibutyag ni Nuez maglisod pa sila karon og pagpresenta og mga dokumento sa COA tungod ang anaa lamang sa ilang mga kamot ang mga dokumento sa mga benepisyaryo human sa kamugnaan ang ilang buhatan o gikan tuig 2000 hangtod sa kasamtangan.
Apan laing problema usab sa buhatan kay pipila na ka mga kooperatiba niini ang nanirado na ug dili na sumala pa nila magukod pa, apan mihimo na sumala pa sila karon og pamaagi aron mabayran ang mga utang niini pinaagi sa pag-imbargo sa mga nahabiling mga asset niini bisan pa og nahunong na ang operasyon sa usa ka koop.
Nangayo na usab sila karon og tabang sa ubang buhatan sa syudad labi na sa City Planning ug City Agri kay posible ang mga nahisgutang koop nagpatabang kini sa ubang buhatan niadtong panahona.
Gipaniguro usab ni Nuez nga tanang kolektahon ubos sa ilang katungdanan dili magkalisod gumikan duna sila kompletong dokumento niini hangtod karon.
Giangkon usab sa opisyal nga sagad sa hinungdan kung nganong wala nakolekta ang mga utang sa mga koop gumikan sa conflict of interest sa mga officers niadtong panahona kung diin giunay lamang sumala pa kini og gamit ang pundo. Samtang ang uban usab nga mga officer niini, patay na ug duna nay mga sakit.
Paningkamotan sumala pa karon sa CDDO nga matubag ang mga pangutana sa nahimong resulta sa audit report sa COA.
