DAVAO CITY – Magsugod na matud pa ang Davao City Bulk Water Supply Project (DCBWSP) sa pagsupply ug tubig ngadto sa ilang mga konsumante sa unang quarter sa 2021.
Sumala pa kang Konsehal Danilo Dayanghirang, ang nahisgutan nga water project sa DCWD ug Apo Agua Infrastructura Inc. (AAII) ang lauman sumala pa nga makahatag ug 300 million liters sa tubig ngadto sa mga konsumante ug hingpit na kini nga mag-operate sa unang quarter sa 2021.
Gitataw sab ni Dayanghirang nga maoy miduso aron nga mapadali ang pagtukod sa maong proyekto, nakiglambigit na sila tali sa DCWD ug AAII kalabot sa pagtukod sa maong proyekto.
Sumala sa AAII executives, sa ilang gipahigayon nga site visit sa Panigan-Tamugan River, gipasalig nila nga ma-comply ang gipangayo nga timeline sa siyudad sa paghatag ug supply sa tubig ngadto sa ilang mga konsumante.
Malipayon sab si Dayanghirang nga adunay kalamboan ang maong proyekto ug gitawag niya kini nga “commendable”.
Gidayeg niya ang AAII ug DCWD gumikan kay gidungog niini ang panawagan sa ilang konsumante alang sa dugang supply sa tubig ilabi na nga adunay pipila ka mga lugar sa dakbayan ang nakasinati karon ug hinay o walay supply sa kuryente ilabi na sa ikaduhang distrito.
Samtang laoman sumala pa ang paghuot sa dagan sa trapiko sa higayon nga mapatuman na ang proyekto sanglit sugdan na sab nila ang pagpahimutang sa 60-kilometer pipeline sa pipila ka mga parte sa siyudad.
