DAVAO CITY – Gisugyot karon sa lokal nga panggamhan ang sister city agreement tali sa Seoul, South Korea kini base sa sugyot sa Philippine Embassy ngadto sa trade delegation nga mibisita sa Korean city sa milabay nga semana.
Sumala pa kang Christian Cambaya, Davao City Investment Promotion Center (DCIPC) Investor Assistance and Servicing Unit head, nga ang Seoul government officials nagplano nga momugna ug agreements tali sa Manila ug Cebu.
Gitataw sab ni Cambaya nga mitubag na sila sa sugyot sa Philippine Embassy diin andam sumala pa ang siyudad nga molagda ug sisterhood agreement tali sa Seoul.
Aron nga mapalig-on pa ang relasyon tali sa duruha ka mga siyudad, giduso sab ni Cambaya ang posibilidad nga pagmugna ug direct flight ilabi na nga mukabat sa 8,000 Korean tourists ang mobisita sa siyudad matag tuig.
Dugang ni Cambaya, naglaom sila nga mamugna ang direct flight ayha matapos ang termino ni Pangulong Rodrigo Duterte.
