Gipahibalo sa Department of Public Works and Highways (DPWH) nga andam ug lig-on ang Davao Bypass Tunnel batok sa mga natural nga katalagman sama sa linog.
Sumala sa Project Manager III sa DPWH Region XI nga si Engr. Joselito Reyes, ang tunnel adunay espesyal nga bahin nga gitawag og Emergency Cross Passage.
Kini nga agianan magtugot sa mga tawo nga makalihok gikan sa North Bound ngadto sa South Bound area panahon sa emerhensiya.
Gikatakda sab nga pagtukoran kini og Operation and Control Center sa gawas sa tunnel aron masiguro ang 24/7 nga pagbantay sa operasyon ug seguridad sa proyekto.
Gipasabot ni Reyes nga daghan pa og buluhaton nga nahibilin, lakip na ang pagsimento sa kalsada sa sulod sa tunnel, pag-instalar og CCTV, ug laing mga elektrikal nga kagamitan.
Gisulti sa DPWH XI nga 60 porsyento na ang kahumanon sa Phase 1-1 sa Davao City Bypass Construction Project, nga naglangkob sa 10.2 kilometro nga dalan, apil ang 2.3 kilometro nga mountain tunnel.
Ang tibuok proyekto adunay gitas-on nga 45.5 kilometro, ug gibahin kini sa lima ka contract package.Sa oras nga mahuman, ang maong dalan magdugtong gikan sa Barangay Sirawan sa Toril, Davao City paingon sa Barangay J.P. Laurel sa Panabo City, Davao del Norte.
