DAVAO CITY – Nakatala na matud pa ang Department of Health (DOH)-Davao ug kinatibuk-ang 21 ka mga namatay tungod sa dengue samtang 4,345 ka kaso ang natala sa rehiyon, as of Agosto 5 ning tuig kasamtangan.
Sumala pa kang Health Assistant Secretary Abdullah Dumama sagad sa mga namatay natala sa dakbayan sa Davao nga anaa sa 11 ka insidente, gisundan sa Davao del Norte nga adunay unom samtang sa Compostela Valley, Davao del Sur, Davao Occidental, ug Davao Oriental aduna tig-usa nga namatay. Sa 2018, nakatala ang DOH-Davao ug 14 ka nga namatay.
Hinuon gitino ni Dumala nga kadtong mga biktima nga nakaangkon ug dengue ang wala natuplokan ug Dengvaxia nga mamahimong makapasamot sumala pa sa kaso.
Ang dakbayan sab sa Davao ang nakatala ug pinakataas nga ihap sa dengue patients nga anaa sa 2,168 gisundan sa Compostela Valley (788), Davao Oriental (641), Davao del Norte (562), Davao del Sur (151) ug ang Davao Occidental nga adunay 35.
Samtang nagtuo ang DOH-Epidemiology Bureau nga posibleng sa bulan sa Oktubre ning tuig kasamtangan, laoman nga mosaka pa ang kaso sa dengue hinungdan nga gi-awhag niini ang publiko nga bungkagon ang dengue breeding sites ug batasanon ang pagpatuman ug 4 o’clock habit sa panimalay ilabi na nga padayon ang masinatian ang ting-ulan.
