DAVAO DEL SUR- Nangayo ug pasaylo ang Davao Del Sur Electric Cooperative kon Dasureco sa nahitabong problema nga giyayag sa social media gikan sa mga konsumante, kabahin sa nahitabong 42nd Annual General Membership Assembly (AGMA) niadtong Dominggo sa Baka Park, Barangay Guihing, Hagonoy, Davao del Sur.
Sumala pa sa kadumalaan sa maong aktibidad nga ang nahitabo nga kagubot atol sa pagparehestro ang gumikan sa bag-ong kamanduan sumala pa sa pagpatuman sa asembliya nga labing unang gihimo ang pisikal nga registration.
Giangkon niini nga wala napugngan ang dagsa sa mga tawo kabahin sa paglinya ayha pa magsugod ang registration.
Dugang pa,adunay nahitabo matud pa nga nasinati nga server issues rason nga nakadelatar kini sa pagdawat sa mga nagapalista.
Nasayran nga subay sa opisyal nga report sa Hagonoy MDRRMO, giklaro sab niini nga walay kamatuoran ang mga mikatag nga balita nga adunay nakabsan sa kinabuhi ug nakaanak atol sa pagparehistro.
Ug gikanayon niini nga usa ka fake news ang mikatag sa social media.
Hinuon giangkon sa kadumalaan sa kooperatiba ang kasaypanan ug gipasalig niini nga dili na kini mahitabo pag-usab ug gamiton sumala pa nila ang kasinatian isip pagtulun-an aron nga mamahimong hapsay ang sunod nga kalihukan.
Nasayran nga mitala ug 19,131 ang kinatibuk-an nga mitambong sa maong panagtigom nga giisip kining labing una nga adunay taas nga ihap sa registration attendance.
