Gikumperma sa Department of Agrarian Reform (DAR) nga gibawi o gipakawad-an ug gahum niini ang Certificates of Land Ownership Awards (CLOAs) sa pipila ka agrarian reform beneficiaries (ARBs) nga napamatud-ang misupak sa pagdili sa pagbaligya, pagparenta o pagprenda sa ilahang yuta sulod sa gikatakdang napulo katuig nga holding period.
Gipahayag ni DAR Undersecretary Rowena Niña Taduran, adunay na-monitor ang ahensya nga mga kaso kung diin giparentahan o gibaligya sa pipila ka benepisyaryo ang ilahang yuta bisan paman nga bag-o pa lamang pormal nga gihatag ang ilahang CLOA.
Apan giila usab sa nahisgutang opisyal nga adunay pipila ka benepisyaryo ang naglisod sa pagsunod sa patakaran gumikan sa kakulang sa puhunan ug hagit nga gi-atubang sa pagpanguma.
Aron maseguro ang pagsunod sa balaod ug mapaayo ang ani ug panginabuhi-an sa mga mag-uuma, padayong naghatag ang DAR ug nagkadaiyang support services lakip na ang paghatag ug farm machinery, equipment, post-harvest facilities ug access sa credit ilabi na sa mga apektado sa kalamidad.
