DAVAO CITY – Muabot na sa 20 ang ihap sa mga kanhi piniriso nga nakagawas gumikan sa GCTA ang misurender sa kapulisan sa rehiyon onse.
Pinaka-ulahi niini mao si alyas Eddie nga taga Cagayan de Oro City kinsa mi-surender kaganinang kaadlawon sa Sta. Ana Police station.
Nasayran nga si Alyas Eddie ang naka-avail sa GCTA niadtong 2018 human mabalhog sa Davao Penal Colony niadtong tuig 2007 gumikan sa kasong pagkalambigit sa iligal nga druga.
Sa pakighinabi sa kapulisan, gikanayon ni alyas Eddie nga nagtuo siya nga bugtong pa-surenderon lamang ug balik mao kadtong mga nalambigit sa heinous crime hinungdan nga nadugay siya sa pagtahan.
Subay sa record sa PRO XI, muabot na sa 349 ang mi-surender diin 20 niini ang gikan sa Davao.
Samtang gikanayon usab ni Davao City Police Office (DCPO) Director Police Col. Alexander Tagum, gilauman nilang mapun-an pa ang nahisgutang ihap taliwala sa pagtapos na sa gihatag nga lugway ni Pangulong Rodrigo Duterte.
Sumala ni Tagum, nakaila na sila ug nakatuod na usab sa pinuy-anan sa nahabilin pang mga ex convict nga pabiling nagmakuli sa pagsurender.
Apan kaganinang buntag lamang gihunong una sa PNP ang pagdakop sa mga wala mitahan nga mga heinous crime convicts gumikan sa request sa DOJ.
