DAVAO CITY – Gilayon sab nga gipakatag ang mga sakop sa Rapid Assessment Teams ilalom sa Municipal Disaster Risk Reduction Management Office (MDRRMO) sa Nabunturan Davao de Oro sa mga flood prone ug land slide prone areas sa lungsod ingon man nagpahigayon ug occular inspection sa pipila ka mga lugar.
Kini human nga misangpot sa RED Heavy Rainfall Warning ang lugar kagabie gumikan sa pag-ulan tungod sa Low Pressure area nga namatikdan sa sidlakan nga bahin sa Mindanao.
Gani adunay mga dalan sa lugar ang dili passable sa tanan nga mga klase sa sakyanan ug motorsiklo partikular na sa “log cabin” Brgy. Bukal gumikan sa pagsaka sa lebel sa tubig sa nahisgutan nga area.
Tungod niini, gisuspende sab ang klase sa lugar pinasikad sa gipagulang Governor Memorandum Order.
Gawas sa Davao de Oro una na sab nga gipailalom sa Red warning level ang Davao Oriental.
Nagpadala na sab ug ekipo ang lalawigan sa Nabunturan-Maragusan road partikular na sa Sitio Salaysayon Cambagang Maragusan arun nga magpahigayon ug clearing operation human nga natabunan sa midahiling yuta ang dalan ug dili kini passable sa mga motorista.
