DAVAO CITY- Gikatahong duha ka mga batang PWDs ang nakabsan sa kinabuhi atol sa nahitabong sunog sa may Magallanes Riverside, Brgy. 2-A, ning dakbayan, kagabii.
Sumala pa ni Loj Sison, usa sa mga nasunogan, lima ka mga bata ang anaa sulod sa maong panimalay niadtong higayona ug tungod sa nabiyaan nga niluto, kalit nga misilaob ang kalayo bandang alas otso traynte sa gabii nga maoy hinungdan sa pagkaugdaw sa gibana-banaang 150 ka mga panimalay.
Dali matud pa nakagawas ang tulo ka mga bata apan wala na nila nadala ug nabalikan pa ang duha ka mga PWDs nga maoy hinungdan sa ilang pagkasunog.
Igo na lamang nakaplagan sa mga otoridad ang ilang sunog nga lawas samtang nagkagakos.
Sumala pa nga wala ang inahan sa mga bata niadtong higayona sanglit nagatrabaho kini isip entertainer.
Gumikan sa maong panghitabo, nagdanguy-ngoy na lamang sa kasakit ang inahan sa mga bata human sa maong insidente.
Ning kasamtangan, gipahiluna na ang patayng lawas sa mga biktima samtang nagpadayon pa ang lalom nga imbestigasyon sa mga otoridad.
Subli sab nagpahinumdom ang mga otoridad sa mga ginikanan nga dili biyaan ang mga anak nga walay kauban nga hamtong sulod sa panimalay.
