DAVAO CITY – Human ang dose ka adlaw sukad nga nagsugod ang diarrhea outbreak sa Toril ning dakbayan sa Davao, mukabat na sa 153 ka mga indibidwal ang hingpit nang nakarekober gikan niini.
Kini mismo ang gikumpirma ni Davao City Health Office Head Dr. Ashley Lopez diin subay sa datos, anaa sa 288 ang kinatibuk-ang ihap sa kaso, 130 ang active cases, samtang lima na ang natalang nakabsan sa kinabuhi.
Kahinumduman nga nadugang sa casualty ang usa ka 36 anyos nga lalaki nga kaslonon na unta sa umaabot nga Agosto 20.
Sumala ni Dr. Lopez, residente sa purok 5 Dahlia street, Crossing bayabas, Toril ang biktima.
Subay sa imbestigasyon, miadto sab sa Rasay Street ang biktima ug nakakaon og street foods ingon man tapioca.
Nasayran nga ugmang adlawa, ipresenta sa CHO ang final conclusive report mahitungod sa outbreak kang Davao City Mayor Sebastian ‘Baste’ Duterte lakip sab niini ang resulta sa mga gipahigayong laboratory tests.
