DAVAO CITY – Malipayong gipadayag sa 10th Infantry Division ang malampuson niining pakigbatok sa insurhensiya ilalom sa administrasyon ni Pangulong Rodrigo Duterte diin nahimong insurgency free ang halos tibouk Davao Region.
Gipahayag ni 10th ID Commander Maj. Gen. Nolasco Mempin, nga gikan sa 15 Guerila fronts ug unom ka Pulang Bagani Commands, nahimong huyang na nga mga guerilla fronts ug Regional Guerilla unit ang nahabilin.
Gipasabot sab sa opisyal nga nahimong dako nga rason sa pagsumpo sa insurhenisya ang Executive Order 70 o ang Whole of Nation Approach on Ending Local Communism and Armed Conflict ni Pangulong Duterte diin daghanang serbisyo ang napaabot niini bisan sa mga lagyo nga mga barangay sa nasud nga kanhi kuta sab sa mga armadong New Peoples Army (NPA).
Gumikan niini, daghang sakop sa mga armadong grupo ang mitahan ug mibalik sa sabakan sa gobyerno alang sa bag-ong kinabuhi.
Samtang, muabot sa 322 ka barangay sa rehiyon ang insurgency cleared diin nahimong gawasnon na ang mga residente niini batok sa gihimo sa NPA sukad niadtong gilusad ang EO 70 ni Duterte niadtong 2018 hangtud ning kasamtangan.
Gawas pa niini, gipahayag usab ni PMaj. Eudisan Gultiano, tigpamaba sa PRO XI, nga dako ang pasalamat sa kapulisan sa rehiyon unse sa nasangpit nga programa sa kanhi pangulo tungod pinaagi sa maong programa, nahatagan og bag-ong paglaum ang mga kanhi rebelde.
Via || Hana Rallos
