DAVAO REGION- Mas gipalapdan pa karon sa Department of Agriculture kon DA XI ang ilahang tabang alang sa mga mag-uuma og kape sa Davao Region nga nagtumong nga mahimong World Class ang kalidad sa kape niini.
Gikabutyag ni DA XI Regional HVCDP Industrial and Fruit Crops Focal Person John Paul Matuginas nga gipailawom na nila sa training o pagbansay ang mga mag-uuma og kape gikan sa probinsya sa Davao de Oro,Davao Oriental, Davao del Norte ug lakip na sa Davao City.
Sumala pa niini nga atol sa training, lakip sa mga nagatudlo mao ang mga mag-uuma nga miyembro sa Balutakay Coffee Farmers gikan sa Bansalan Davao del Sur aron maka-ambit sa ilahang mga kahibalo.
Gawas sa maong training, nagapadayon usab ang pag-apod-apod niini og mga planting materials, seedling, fertilizers, equipement, pasilidad ug uban pa ngadto sa mga mag-uuma og kape sa rehiyon onse.
Dugang usab sa gibutyag niini nga sukad tuig 2015 hangtod ning tuiga, mikabat na sa P150 million ang ilahang nahatag nga interbensyon ngadto sa mga mag-uuma og kape dinhi sa rehiyon.
Ang maong kantidad ang pinaagi kana sa ilahang paghatag og mga planting materials, seedlings, post-harvest facilities, abono ug farm inputs, logistics, transports ug mga pagbansay.
Dugang pa niini nga suportado usab sa DA XI ang mga Expo ug Exibits sa mga coffee farmers aron mas ma-promotar pa ang ilahang mga produkto.
