DAVAO CITY – Laing namatay nga balyena na sab ang nakaplagan sa baybayon sa Panabo City kagahapong adlawa.
Una ng gibutyag ni Darrell Blatchley, usa ka Davao-based Marine Biologist, nga ang nahisgutan nga balyena usa ka Cuviers Beaked Whale nga dunay gitas-on nga 18-19 ft.
Samtang sa migula sa gipahigayon nga necropsy, walay plastic o butang nga nakita sulod sa tiyan sa Cuvier Beaked Whale.
Sumala pa kang Blatchley, posibleng natural death lang kini sanglit walay nakitang mga samad sa iyang kalawasan.
Magpahigayon pa og laboratory test ang BFAR aron masuta rason sa pagkamatay niini.
Kahinumduman nga sa milabay nga domingo, usa sab ka sperm whale nga wala nay kinabuhi ang narekober daplin sa baybayon duol sa coastal road sa Matina Aplaya ning siyudad.
Sumala pa kang Blatchley, kini na ang ika-unom nga balyena nga midagsa sa baybayon nga sakop sa Davao region.
Nasayran sab sa nahisgutan nga sagad mamatay ang susama nga klase sa isda gumikan sa mga basura nga makaon niini sa baybayon.
Una na sab nga gibutyag sa nahisgutan nga sa kapin 60 ka mga namatay nga balyena nga midagsa sa mga baybayon sa Davao region, kapin 50 niini ang namatay gumikan sa tawo sama na lamang sa dili tukma nga paglabay sa basura.
