DAVAO CITY – Subling nagpahimangno ang ahensiya sa City Transport and Traffic Management Office (CTTMO) ngadto sa publiko ilabi na sa mga motorista kalabot sa mga dalan nga pasirad-an atol sa selebrasyon sa Kadayawan sa Dabaw festival.
Una ng gi-aprubahan City Council ang road closure human nga gihangyo kini City Tourism Operations Office (CTOO).
Atol sa Indak-Indak sa Kadayawan street dance competition, pasirad-an ang Kadayawan Square sa San Pedro Street, pasirad-an sugod Agosto 13 nga magsugod sa alas otso sa gabii hangtud na sa alas dose sa kaadlawon sa Agosto 16 samtang fully closed kini sa Agosto 17 nga magsugod sa alas dos sa kaadlawon.
Sakop sa mga pasirad-an ang Roxas Avenue , C.M. Recto Avenue , Bonifacio Street, Pelayo Street, ngadto na sa San Pedro Street. Kahinumduman nga susamang mga dalan sab ang pasirad-an atol sa pamulak sa Kadayawan.
Atol sa Tambayayong Sa Kadayawan, full road closure ang ipatuman sa Agosto 24, sugod sa alas sais sa gabii hangtud na sa alas dies sa gabii sa San Pedro Square sa Rizal Park. Kalakip sab sa mga pasirad-an ang A. Pichon Street, kanhi Magallanes Street, ug City Hall Drive-Magallanes ingon man Bolton streets paingon sa San Pedro ug C.M. Recto streets, ingon man ang Rizal ug Anda streets lahos na sa San Pedro Street.
Ang Indak-Indak ipahigayon sa Agosto 17 samtang ang Pamulak himuon sa Agosto 24.
