DAVAO CITY – Gikanayon sa Davao City Social Services and Development Office (CSSDO) nga nakatala sumala pa sila ug 10,000 ka mga pamilya nga apektado sa kusog nga pagbaha sa milabay nga semana kini base na sab sa ilang gi-presenta nga report.
Sumala pa kang CSSDO head Maria Luisa Bermudo, mayorya sa mga apektadong pamilya ang naggikan sa mga barangay sa Talomo District nga anaa sa 5,000, gisundan sa mga areas sa Bangkal nga adunay 3,000 ka mga pamilya.
Hinuon gikanayon ni Bermudo nga nagpahigayon pa gihapon ang ahensiya ug validation alang sa pagproseso sa hinabang nga ihatag sa matag pamilya.
Una na sab nga gibutyag sa CSSDO nga anaa sa 3, 559 ka mga apektadong pamilya ang natala sab nila sa mga barangay sa Los Amigos ug Tugbok Proper sa Tugbok District, Talomo sa Talomo District, ug Wangan sa Wangan District.
Sa kasamtangan, gisapinal na nila ang master list sa mga apektadong biktima ayha ihatag ang financial assistance sa matag pamilya.
Kahinumduman nga bag-ohay lamang nga naaprubahan sa City Council ang P50-million cash assistance ngadto sa mga biktima diin ang matag pamilya makadawat ug P10,000.
