Magpadayon karong adlawa, Hulyo 14, ang cross-examination sa kampo ni Vice President Sara Duterte batok sa ikaduhang testigo sa House prosecution panel, human sa kapin unom ka oras nga pagdungog kagahapong adlaw.
Sumala pa, gisugyot ni Senator-Judge Juan Miguel Zubiri ang temporaryong pagpahunong sa pagdungog niadtong alas-8 sa gabii samtang nagpadayon pa ang pagpangutana ni defense counsel Atty. Mark Vinluan kang NBI Regional Director Atty. Jeremy Lotoc.
Matod pa ni Zubiri, bisan iyang giila ang lawom nga pagpangutana sa depensa, mas angay nga ipadayon na lamang ang cross-examination karong adlawa aron adunay igong panahon ang tanang panig. Dugang pa niini, gipangutana ni Presiding Officer ug Senator-Judge Francis “Chiz” Escudero si Atty. Vinluan kon unsa pa kadugay ang ilang cross-examination, diin iyang gitubag nga halos katunga pa lamang sa ilang mga pangutana ang nahuman.
Gipatin-aw usab ni Escudero nga wala gipugngan sa impeachment court ang oras nga magamit sa depensa sa cross-examination, kondili gusto lamang masayran kon mahimo bang ipadayon ang pagdungog sa mosunod nga adlaw. Lakip sa miuyon ang kampo sa depensa sa maong sugyot, nga maoy hinungdan sa pormal nga pagtapos ni Escudero sa ikaupat nga adlaw sa impeachment trial.
Sa pagkakaron, gilauman usab nga ipresentar sa House prosecution panel karong adlawa si Office of the Vice President Chief of Staff Zuleika Lopez isip ikatulong testigo sa nagpadayon nga impeachment trial batok kang Vice President Sara Duterte.
