DAVAO CITY – Mihimo na sa ilang mosunod nga lakang ang crisis committee sa Davao Occidental alang sa hinanali nga pagbuhi sa barangay kagawad sa Little Baguio sakop sa Malita Davao occidental nga gibihag sa mga armadong grupo.
Una ng gikumpirma ni Chief Inspector Samson Kimayong sa Malita PNP nga gibihag ang biktima nga si kagawad Luis Angos residente sa nahisgutan nga lugar.
Sa inisyak nga imbestigasyon, kalit sumala pa nga mitunghan ang mga gituhoang sakop sa New People’s Army (NPA) sa pinuy-anan sa opisyal sa Sitio Paglidong sa maong lalawigan ug pugsanon nga gidala si Angos.
Dili pa matino sa otoridad kung unsa ang motibo sa pagpangdagit nga gituohang mga sakop sa Committee Front 72 nga gipangunahan sa usa ka Kumander Cocoy.
Human ang insidente, nagpahigayon ug tigom ang lokal nga panggamhanan sa lalawigan sa pagpanguna ni Davao Occidental Governor Claude Bautista aron mahan-ay ang ipahigayon nga negosasyon alang sa luwas nga pagbuhi sa kagawad.
Alerto karon ang mga sakop sa 73rd Infantry Battalion sa Philippine Army ingon man Davao Occidental Provincial Police Office ilabi na nga sunod-sunod ang gihimong pagpangatake sa mga rebelde sa kasikbit niini nga probinsiya sa milabay nga adlaw.
