DAVAO CITY – Taliwala paman sa diskriminasyon nga nadawat sa mga Chinese nationals tungod sa pagkuyanap sa 2019 Wuhan coronavirus kun nCoV, mitanyag og tabang ang Konsulada Heneral sa China sa Davao Medical Community partikular na sa hisgutanang language barrier sa mga chinese-speaking nga mga pasyente nga ma-admit sa mga lokal nga balay tambalanan.
Sa pagpanguna ni Consul-General Li Lin sa konsulada sa Davao City, mipasalig nga ang ilang buhatan andam nga motabang sa mga pasyente nga Chinese nga ma-admit sa mga hospital tungod kay usa ang Pilipinas sa daghanang mga nasud nga naningkamot sa pagmonitor aron mapugngan ang pagsulod ug pagkuyanap sa 2019 novel coronavirus kun 2019 nCoV.
Gisugyot usab ni Li Lin nga ang mga lokal nga hospital mamahimong makakuha og kooperasyon sa mga Chinese community sa Davao kung inkaso manginahanglan sila og tighubad o interpreter sa mga pasyente.
Gibutyag usab sa City Health Office nga aduna silay walo ka mga chinese nationals ang gimonitor nga gidudahang dunay nCoV.
Apan, gitin-aw usab nila nga nagpabiling gawasnon ang Dakbayan sa Davao batok 2019-nCoV.
Sumala ni Li Lin nga duna nay usa ka Chinese national ang nag negatibo sa maong virus.
Bisan pa man,wala na matud pay natalang mga turistang Chinese nga nagpabilin sa dakbayan sa Davao tungod kay gituman matud pa nila ang kamandoan gikan sa Chinese government.
Giawhag sab ni Li Lin ang publiko nga magpabiling kalmado ug dili magpanic apan magpabiling magbinantayon tungod kay usa ka makatakod ang nasangpit nga sakit.
