Gidakop sa mga sakop sa IGACOS Police Station ang usa ka 48-anyos nga construction worker nga giilang si alyas Mario human niini dunggaba ang usa ka inahan ug ang 11-anyos nga anak niini sa Purok 7-A, Sitio Moncado, Barangay Peñaplata, Samal District, kagahapon sa hapon.
Base sa imbestigasyon, samtang nagbarug si Leti, 50-anyos, sa atubangan sa ilang balay, kalit kining giduolan sa suspek, gitiunan og kutsilyo ug gituok.
Misulay pa og tabang ang anak nga Grade 6 student apan nadunggaban kini sa likod.
Dayon misibat ang suspek human sa insidente apan nadakpan sa gikasang hot pursuit operation sa kapulisan.
Padayon karon nga ginatambalan sa ospital ang menor de edad nga biktima, samtang ang suspek anaa na sa kustodiya sa IGACOS PNP ug gikasuhan og attempted homicide.
Gipahimangnoan sa kapulisan ang publiko nga magmatngon ug dayon ireklamo sa mga otoridad ang bisan unsang hulga sa seguridad aron malikayan ang susamang panghitabo.
