Gidali og pagdala sa Southern Philippines Medical Center (SPMC) ang usa ka lalaki human gimartilyo ang ulo sulod sa usa ka construction site sa Mountain View, Barangay Catalunan Grande, ning dakbayan sa Davao pasado alas 12:00 ang takna kaganihang kaadlawon( Hulyo 23).
Subay sa report sa Davao City Police Office (DCPO), kritikal ang kahimtang sa biktima nga giilang si alyas “Norlito”, 29 anyos, usa ka construction worker ug residente sa Purok 8, Brgy. Candalian, Baguio District ning syudad.
Samtang giila ang suspetsado nga si alyas “Nistor”, 35 anyos, residente sa Macatabo, Calinan, ning syudad sa Davao.
Sa inisyal nga imbestigasyon sa kapulisan, nag-inom og ilimnong makahubog ang duha sulod sa construction site nga misangpot sa panaglalis ug pagsinumbagay.
Apan kalit na lamang nga mikuha og martilyo si “Nistor” ug gipikhan ang biktima nga naigo sa ulo, hinungdan nga kini nakaangkon og samad ug pagdugo hangtod nga nawad-an kini sa panimuot.
Naaresto gilayon ang suspetsado ug kasamtangang nakakustodiya na sa kapulisan ug giandam na ang kasong Frustrated Homicide batok kaniya.
Padayon pang ginamonitor ang kahimtang sa biktima nga karon anaa na sa talandugon ang sitwasyon.
